阿史早排睇科幻小說《三體》，依本攞咗「科幻界諾貝爾」嘅著作，內容果然與眾不同，第一本最後講到古箏行動响巴拿馬運河用納米線割開成隻輪船，睇到阿史嘩嘩聲。巴拿馬運河其實係巴拿馬重要經濟命脈，連接太平洋同大西洋，更被稱為世界七大工程奇跡之一。講開運河，到底佢嘅所在之處——巴拿馬，有咩特別之處？

巴拿馬位於中美洲，四百幾萬人口裏面，有超過5%嘅人都係華人，有華人血統嘅保守估計都有10%！而華人入面有成80%都係嚟自廣州花都，剩低嘅就嚟自恩平、開平、台山、新會、中山等地。

巴拿馬華僑嘅歷史大概可以追溯到1854年，果陣有成700幾人搭住一隻叫「海巫號」嘅船，由汕頭出發，離鄉別井去巴拿馬修築巴拿馬鐵路同開鑿巴拿馬運河。直至到巴拿馬運河喺1914年竣工，前後30年間，大概有成萬個華人陸續去巴拿馬做勞工。呢啲華人靠付出勞力而喺巴拿馬賺到第一桶金，開始喺巴拿馬做啲小生意，落地生根，好多華工都會接埋鄉下嘅屋企人一齊移民，於是生活喺巴拿馬嘅華人就越嚟越多。

由於當地嘅華人以廣東人居多，所以都係用粵語交流，亦都有華人團體開辦中文班教授中文。由於巴拿馬以前係同台灣建交，呢啲教中文嘅學校主要係用粵語嚟教繁體字。